XXXII edición da Carreira Escolar do Salnés: solidariedade, deporte e moitas metas compartidas
O venres 16 de maio pola mañá tivo lugar a XXXII edición da Carreira Escolar do Salnés, unha cita xa tradicional no noso calendario que volveu reunir a alumnado desde 1.º de Educación Primaria ata a categoría de afeccionados. Como cada ano, viviuse unha xornada chea de enerxía, compañeirismo e emoción, na que participaron numerosos colexios da comarca.
Ademais do compoñente deportivo, esta carreira destaca polo seu carácter solidario. Grazas ás achegas voluntarias dos corredores, recadáronse fondos que serán doados á Asociación Aladina, unha entidade que traballa incansablemente na loita contra o cancro infantil. Unha forma de correr co corazón, máis aló da liña de meta.
O espírito de superación, a convivencia entre centros e a implicación de familias, docentes e estudantes converteron esta nova edición nunha auténtica celebración dos valores que o deporte escolar representa.
