Este venres, día 20 de decembro pola mañá, celebrouse nas instalacións do Colexio Plurilingüe Abrente un mercado solidario con fin de recadar cartos para a Asociación Neen@s Sanxenxo.
Esta asociación sen ánimo de lucro desenvolve a súa actividade apoiando a nenos e nenas con NEAE (necesidades específicas de apoio educativo).
Para a realización deste mercado, o alumnado da escola aportou xoguetes, libros, roupa e outros artigos de 2ª man que se puxeron a venda en diferentes stands cuns prezos de entre 0,5€ e 5€.
Durante o desenvolvemento do mercado realizáronse diversas actividades lúdicas como pintacaras, zumba, panxoliñas e as badaladas de Fin de Ano, incluíndo ademais a visita do Apalpador.
