O alumnado de 1º de ESO participou o pasado 16 de abril nunha divertida xornada deportiva no Pontillón do Castro, dentro do programa XOGADE da Xunta de Galicia.
A actividade, centrada na modalidade de Dragon Boat, permitiu aos estudantes iniciarse no piragüismo dunha forma dinámica e moi participativa. Organizados en equipos, remaron ao unísono ao ritmo do tambor, mostrando unha gran coordinación e, sobre todo, un marcado espírito competitivo nas distintas regatas.
O ambiente foi inmellorable, combinando esforzo, compañeirismo e moitos risos durante toda a xornada. Ademais, a actividade desenvolveuse nunha contorna segura e baixo a supervisión de monitores especializados.
Sen dúbida, unha experiencia moi positiva que o alumnado desfrutou ao máximo e que deixou ganas de repetir.
